गणपतराव पाटील यांना स्व. सा. रे. पाटील यांचा राजकीय वारसदार म्हणून एक वेळ संधी द्या
दानोळी येथे विजय निश्चय मेळाव्यात सांगलीचे खासदार विशाल पाटील यांचे आवाहन
शिरोळ / प्रतिनिधी
स्व.सा.रे.पाटील यांनी राजकारणाबरोबरच कारखाना, विविध संस्थांच्या माध्यमातून प्रचंड मोठे काम केले. पुरोगामी चळवळीला साथ देण्याचेही त्यांनी काम केले. कर्तृत्ववान माणसाचा वारसदार होणे हे अतिशय अवघड असते, पण गणपतराव पाटील यांनी सा.रे.पाटील यांच्या विचारांचा वारसा सुरूच ठेवला आहे.गणपतराव पाटील यांना सा.रे.पाटील यांचा राजकीय वारसदार म्हणून बघायचे असेल तर सर्व मतदारांनी त्यांना एक संधी देणे गरजेचे आहे. जर त्यांना निवडून दिले नाही तर राजकीय वारसदार ते कसे ठरतील? त्यासाठी आणि सा.रे.पाटील यांचे पुरोगामी विचार पुढे जाण्यासाठी त्यांना विधानसभेत पाठवा, असे आवाहन सांगलीचे खासदार विशाल पाटील यांनी केले.लोकांची लुबाडणूक करून आणि आमिषे दाखवून सत्ता मिळवली जात आहे.यातून बाहेर पडण्यासाठी काँग्रेसचे हात बळकट करून,स्थिर सरकार स्थापन करण्यासाठी महाविकास आघाडीला प्रचंड मतांनी निवडून देणे आवश्यक असल्याचेही त्यांनी स्पष्ट केले.दानोळी (ता. शिरोळ) येथे महाविकास आघाडीचे उमेदवार गणपतराव पाटील यांच्या प्रचारासाठी आयोजित विजय निश्चय मेळाव्यात ते बोलत होते.माजी आमदार राजीव आवळे म्हणाले,मतदारांनी मान शरमेने खाली घालावे आणि मतदारांच्या पाठीत खंजीर खुपसण्याचे काम विद्यमान आमदारांनी केले आहे.त्यांना जर संधी दिली तर ते पुन्हा एकदा जातीयवादी पक्षाला बळकटी देण्यासाठी त्यांच्या मांडीला मांडी लावून बसतील.जो आपल्या मतांचा बाजार मांडतो त्याला थांबवणे गरजेचेच बनले आहे.शेवटचा माणूस केंद्रबिंदू मानून त्यांच्या प्रगतीसाठी काम करणाऱ्या स्वच्छ प्रतिमेच्या गणपतराव पाटील यांना निवडून देण्यासाठी कोणत्याही आमिषाला बळी पडू नका आणि त्यांना सेवा करण्याची संधी द्या.
