१६ वर्षांचा दुरावा संपला; धनगर समाजाचे दोन्ही गट एकत्र!;मनं जुळली, माणसं जोडली; शिरोळमध्ये सामाजिक ऐक्याचा नवा आदर्श
गणपतराव पाटील यांच्या हस्ते समाजबांधवांचा सन्मान; युवा पिढीच्या पुढाकाराला ज्येष्ठांची साथ
शिरोळ / संदीप इंगळे
शिरोळ येथील धनगर समाजामध्ये गेल्या तब्बल १६ वर्षांपासून सुरू असलेला ५२ आणि ८० गटांमधील अंतर्गत वाद अखेर सामंजस्याने मिटला आहे. अनेक वर्षांचा दुरावा, मनातील कटुता आणि परस्परांमधील मतभेद बाजूला ठेवत दोन्ही गटांनी एकत्र येण्याचा ऐतिहासिक निर्णय घेतला. या निर्णयामुळे शिरोळमधील धनगर समाजात आनंदाचे वातावरण निर्माण झाले असून, सामाजिक ऐक्याच्या दिशेने एक महत्त्वाचे पाऊल पडले आहे. दत्त उद्योग समूहाचे प्रमुख गणपतराव पाटील यांनी या एकीचे स्वागत करत, ‘वाद जिंकण्यापेक्षा माणसं जोडणं अधिक महत्त्वाचं असतं,’ असे प्रतिपादन केले.
या सामंजस्याच्या पार्श्वभूमीवर श्री दत्त कारखान्याच्या कार्यस्थळी दोन्ही गटांतील समाजबांधवांचा सन्मान करून त्यांच्या एकत्र येण्याच्या निर्णयाचे मनापासून अभिनंदन करण्यात आले. गेल्या अनेक वर्षांपासून एकमेकांपासून दुरावलेल्या समाजबांधवांनी पुन्हा एकत्र येण्याचा घेतलेला निर्णय हा केवळ दोन गटांमधील वाद मिटण्यापुरता मर्यादित नसून, समाजाच्या भावी वाटचालीला नवी दिशा देणारा ठरणार आहे.
गेल्या १६ वर्षांपासून दोन्ही गटांमध्ये अंतर्गत मतभेद असल्याने त्याचा परिणाम सामाजिक आणि कौटुंबिक संबंधांवरही झाला होता. समाजातील लग्नसमारंभ, यात्रा, धार्मिक कार्यक्रम तसेच एखाद्या कुटुंबावर ओढवलेल्या दुःखद प्रसंगीही एकमेकांच्या गटात जाणे अनेकदा अडचणीचे ठरत होते. एकाच समाजातील बांधव असूनही मनांमध्ये निर्माण झालेली दरी सामाजिक एकोप्याला बाधा आणत होती. या परिस्थितीची सल विशेषतः नव्या युवा पिढीला जाणवत होती.
शिरोळ शहरात धनगर समाजाची संख्या मोठी असून तालुक्यातील ग्रामीण भागातही या समाजाला मानाचे स्थान आहे. सामाजिक, शैक्षणिक, धार्मिक आणि विविध क्षेत्रांमध्ये समाजाचे योगदान महत्त्वपूर्ण आहे. मात्र, अंतर्गत गटबाजीमुळे समाजाची सामूहिक ताकद विभागली जात असल्याची भावना तरुणांमध्ये निर्माण झाली होती. समाजातील प्रत्येक सुख-दुःखाच्या प्रसंगी सर्वांनी एकत्र असावे, परस्परांमधील संबंध पुन्हा दृढ व्हावेत आणि पुढील पिढीला एकसंघ समाजाचा वारसा मिळावा, अशी अपेक्षा युवा वर्गातून व्यक्त होत होती.
याच भावनेतून दोन्ही गटांतील तरुणांनी पुढाकार घेत ज्येष्ठ मंडळींशी संवाद साधण्यास सुरुवात केली. युवा पिढी आणि ज्येष्ठ समाजबांधव यांच्या बैठका घेण्यात आल्या. चर्चेच्या माध्यमातून एकमेकांच्या भावना समजून घेण्यात आल्या. जुन्या मतभेदांपेक्षा समाजाचे व्यापक हित महत्त्वाचे असल्याची जाणीव सर्वांना झाली. अखेर संवाद, समजूतदारपणा आणि सामंजस्याच्या बळावर १६ वर्षांपासून कायम असलेला दुरावा संपुष्टात आला.
या निर्णयाचे स्वागत करताना गणपतराव पाटील म्हणाले की, काळ कितीही मोठा असला तरी मनात एकमेकांविषयी आपुलकी आणि एकत्र येण्याची इच्छा असेल, तर कोणताही दुरावा कायमचा राहत नाही. मतभेदांमुळे माणसं दूर जातात; मात्र संवाद, समजूतदारपणा आणि सामंजस्यामुळे ती पुन्हा जवळ येतात. समाजात वाद निर्माण होण्यापेक्षा ते मिटवण्यासाठी पुढाकार घेणारी माणसं महत्त्वाची असतात. आज दोन्ही गटांनी एकत्र येण्याचा घेतलेला निर्णय कौतुकास्पद असून, तो संपूर्ण समाजासाठी प्रेरणादायी आहे.
ते पुढे म्हणाले की, समाजातील एकीमुळे नव्या पिढीसमोर बंधुभाव, सामाजिक सलोखा आणि परस्पर सहकार्याचा आदर्श निर्माण झाला आहे. माणसं जोडली गेली की समाज घडतो आणि समाज एकत्र आला की प्रगतीची नवी दारे खुली होतात. त्यामुळे ही एकी केवळ आजच्या आनंदापुरती न राहता भविष्यातही कायम टिकली पाहिजे.
१६ वर्षांचा दुरावा संपवून एकत्र आलेल्या धनगर समाजाच्या दोन्ही गटांनी शिरोळमध्ये सामाजिक ऐक्याचा नवा संदेश दिला आहे. जुन्या कटुतेवर आपुलकीने, मतभेदांवर संवादाने आणि गटबाजीवर बंधुभावाने मात करता येते, याचा प्रत्यय या घटनेतून आला आहे. समाजाच्या एकजुटीचा हा निर्णय आगामी पिढ्यांसाठी निश्चितच प्रेरणादायी ठरणार आहे.