पुलाची शिरोली प्रतिनिधी कुबेर हंकारे
हातकणंगले तालुक्यातील कासारवाडी येथिल डोंगर परिसरात बिबट्याच्या सतत वावर आहे. वाघजाई मंदिर समोरील बडव्यांच्या मळा परिसरात आनंदा नारायण गांजणे यांची शेतात वस्ती आहे .या ठिकाणी गुरुवारी रात्री बिबट्याने झडप घालत जर्मन शेफर्ड जातीच्या कुत्र्यावर प्राणघातक हल्ला केला. यामध्ये कुत्र्याचा मुत्यु झाला , शुक्रवारी सकाळी कुत्र्याचे धड उसाच्या शेतात पोट फाडून खाल्लेल्या अवस्थेत आढळून आले . या ठिकाणच्या पाऊलखुणा व कुत्रा खाण्याची पध्दत बिबट्याची असल्याचा दुजोरा रेस्कु टिमचे सदस्य व प्राणी मित्रांच्या कडुन देण्यात आला.गेल्या काही दिवसांपासून वाघजाई मंदिर परिसरात बिबट्याचे पायांचे ठसे, तसेच मेंढी, कुत्र्याच्या मरणाऱ्या घटना व अन्य हालचाली दिसून येत होत्या या ठिकाणी मेंढपाळ आनंदा गांजणे यांची वस्ती असुन या ठिकाणी शेकडो मेंढ्या आहेत भक्ष्याच्या शोधात या परिसरात बिबट्याचा वावर सातत्याने दिसून आला आहे. पंधरा दिवसांपूर्वी सागवान नावाच्या शिवारालगत मेंढपाळाची एक मेंढी खाल्याचे निदर्शनास आले होते तर परिसरातील अनेक भटकी कुत्री गायब असल्याचे दिसून येते .वनविभागाच्या पथकाने बिबट्याच्या हालचालींचा मागोवा घेण्यासाठी ड्रोनच्या सहाय्याने परिसराची तपासणी सुरू केली आहे. पशुधन सांभाळताना विशेष काळजी घेण्याचे सूचित करण्यात आले आहे.