शिरोळ नगरपालिकेकडून सफाई कर्मचाऱ्यांना संरक्षण किटचे वितरण; ‘नमस्ते दिन’ उत्साहात साजरा
शिरोळ / प्रतिनिधी
शिरोळ शहराच्या स्वच्छता, आरोग्य आणि सर्वांगीण विकासामध्ये नगरपालिका कर्मचाऱ्यांचे योगदान अत्यंत महत्त्वपूर्ण असून त्यांच्या आरोग्यदायी, सुरक्षित आणि सन्मानपूर्ण जीवनासाठी शिरोळ नगरपालिका सदैव कटिबद्ध राहील, असा विश्वास उपनगराध्यक्ष पृथ्वीराजसिंह यादव यांनी व्यक्त केला. सफाई कर्मचाऱ्यांना आवश्यक संरक्षणात्मक साहित्य उपलब्ध करून देण्याबरोबरच त्यांच्या कल्याणासाठी विविध शासकीय व स्थानिक स्तरावरील योजना प्रभावीपणे राबविण्यात येतील, असेही त्यांनी सांगितले.
शिरोळ नगरपालिकेत केंद्रीय सामाजिक न्याय व अधिकारिता मंत्रालयाच्या वतीने आयोजित करण्यात आलेला ‘नमस्ते दिन’ उत्साहपूर्ण वातावरणात साजरा करण्यात आला. राष्ट्रीय यांत्रिकृत स्वच्छता परिसंस्था (NAMASTE) योजनेच्या जनजागृती आणि स्वच्छता कर्मचाऱ्यांच्या सन्मानार्थ हा दिवस साजरा करण्यात येतो.यानिमित्ताने नगरपालिकेतील सर्व सफाई कर्मचाऱ्यांना संरक्षणात्मक किटचे वितरण करण्यात आले.
शिरोळ नगरपालिकेच्या प्रथम लोकनियुक्त महिला नगराध्यक्षा सौ. योगिता कांबळे यांच्या अध्यक्षतेखाली आयोजित कार्यक्रमात उपनगराध्यक्ष पृथ्वीराजसिंह यादव यांच्या प्रमुख उपस्थितीत मान्यवरांच्या हस्ते कर्मचाऱ्यांना संरक्षण किट प्रदान करण्यात आले. यावेळी हातमोजे, सुरक्षा बूट, मास्क, रेनकोट, हेल्मेट तसेच इतर आवश्यक सुरक्षा साहित्याचा समावेश असलेले किट कर्मचाऱ्यांना देण्यात आले.
यावेळी बोलताना उपनगराध्यक्ष यादव म्हणाले, “शहर स्वच्छ, सुंदर आणि निरोगी ठेवण्यासाठी सफाई कर्मचारी प्रतिकूल परिस्थितीतही अत्यंत प्रामाणिकपणे सेवा बजावत आहेत. त्यांच्या कार्यामुळेच नागरिकांना स्वच्छ वातावरण मिळते. त्यामुळे त्यांच्या आरोग्याची, सुरक्षिततेची आणि सामाजिक सन्मानाची जबाबदारी नगरपालिकेची आहे. त्यांच्या हितासाठी आवश्यक त्या सर्व सुविधा आणि कल्याणकारी योजना राबविण्याचा आमचा प्रयत्न कायम राहील.”
नगराध्यक्षा सौ. योगिता कांबळे यांनीही सफाई कर्मचाऱ्यांच्या कार्याचे कौतुक करताना सांगितले की, “स्वच्छ शहर ही प्रत्येक नागरिकाची अपेक्षा असते. ही अपेक्षा पूर्ण करण्यासाठी सफाई कर्मचारी अहोरात्र मेहनत घेत असतात. त्यांच्या सुरक्षिततेसाठी संरक्षणात्मक साहित्य उपलब्ध करून देणे ही नगरपालिकेची प्राथमिक जबाबदारी आहे. भविष्यातही कर्मचाऱ्यांच्या कल्याणासाठी विविध उपक्रम राबविण्यात येतील.”
कार्यक्रमात नमस्ते योजनेची माहिती देताना संबंधित अधिकाऱ्यांनी स्वच्छता कर्मचाऱ्यांच्या आरोग्य तपासणी, सुरक्षित कामकाज, आधुनिक यंत्रसामग्रीचा वापर, कौशल्य विकास तसेच सामाजिक सुरक्षा योजनांबाबत मार्गदर्शन केले. स्वच्छता व्यवस्थेमध्ये मानवी हस्तक्षेप कमी करून यांत्रिकीकरणाला प्रोत्साहन देणे आणि कर्मचाऱ्यांच्या आरोग्याचे संरक्षण करणे हा या योजनेचा मुख्य उद्देश असल्याचे त्यांनी स्पष्ट केले.
या कार्यक्रमास मुख्याधिकारी निशिकांत प्रचंडराव, बांधकाम सभापती सौ. अनिता संकपाळ, आरोग्य सभापती विजय आरगे, महिला व बालकल्याण सभापती सौ. कल्पना काळे, उपसभापती सौ. अनुराधा गुरव, शिक्षण सभापती शरद ऊर्फ बापू मोरे, नगरसेवक दीपक भाट, उल्हास आवळे, ओंकार गावडे, निलेश गावडे, सचिन शिंदे तसेच नगरसेविका सुवर्णा कांबळे, रेखा कोरे, सविता पुजारी यांच्यासह सर्व नगरसेवक, नगरसेविका, विविध क्षेत्रातील मान्यवर, प्रतिष्ठित नागरिक, अधिकारी आणि कर्मचारी मोठ्या संख्येने उपस्थित होते.
कार्यक्रमाच्या माध्यमातून स्वच्छता कर्मचाऱ्यांप्रती कृतज्ञता व्यक्त करण्यात आली तसेच त्यांच्या कार्याचा गौरव करण्यात आला. संरक्षण किटचे वितरण झाल्यानंतर कर्मचाऱ्यांनीही नगरपालिकेचे आभार व्यक्त करत अधिक सुरक्षित वातावरणात सेवा देण्याची भावना व्यक्त केली.
शहराच्या स्वच्छतेसाठी दिवस-रात्र परिश्रम घेणाऱ्या सफाई कर्मचाऱ्यांच्या आरोग्य, सुरक्षितता आणि सन्मानाला प्राधान्य देत शिरोळ नगरपालिकेने राबविलेला हा उपक्रम सामाजिक बांधिलकीचे प्रतीक ठरला. ‘नमस्ते दिन’ निमित्त आयोजित कार्यक्रमामुळे स्वच्छता कर्मचाऱ्यांचा आत्मविश्वास वाढण्यास मदत झाली असून प्रशासन आणि कर्मचाऱ्यांमधील समन्वय अधिक दृढ होईल, असा विश्वास उपस्थित मान्यवरांनी व्यक्त केला.