कुरुंदवाड / प्रतिनिधी
राष्ट्रसेवा मंडळ, कुरुंदवाड यांच्या वतीने आणि महाराष्ट्र राज्य कबड्डी असोसिएशन व अमॅच्युअर कबड्डी फेडरेशन ऑफ इंडिया यांच्या मान्यतेने आयोजित करण्यात आलेल्या निमंत्रित भव्य प्रो-कबड्डी स्पर्धेचा उत्साही समारोप झाला. तबक मैदानावर झालेल्या या स्पर्धेत पुरुष विभागात जे.डी. अकॅडमी-नोएडाने, तर महिला विभागात एम.डी. स्पोर्ट्स-पुणेने विजेतेपद पटकावले.
पुरुषांच्या अंतिम सामन्यात जे.डी. अकॅडमी-नोएडाने शिवमुद्रा स्पोर्ट्स-कौलवचा 37 विरुद्ध 35 अशा 2
गुणांनी पराभव करत स्व.डॉ.आप्पासाहेब उर्फ सा. रे. पाटील चषकावर नाव कोरले. उपविजेतेपद शिवमुद्रा स्पोर्ट्स-कौलवने पटकावले, तर तृतीय क्रमांक मलथलाई-बेंगळुरू आणि एम.एस. स्पोर्ट्स-जमखंडी या संघांनी विभागून घेतला.
महिला विभागातील अंतिम लढतीत एम.डी. स्पोर्ट्स-पुणेने डॉ.शिरोडकर स्पोर्ट्स-मुंबईवर २४ विरुद्ध २१ अशा ३ गुणांनी विजय मिळवत स्व. आक्काताई जिनगोंडा पाटील चषकावर नाव कोरले. शिरोडकर स्पोर्ट्स-मुंबईला उपविजेतेपदावर समाधान मानावे लागले. स्वराज्य स्पोर्ट्स-मुंबई आणि शिवशक्ती स्पोर्ट्स-मुंबई यांनी संयुक्तपणे तृतीय क्रमांक पटकावला.
या स्पर्धेच्या बक्षीस वितरण समारंभाला पालकमंत्री प्रकाश आबिटकर, खासदार धैर्यशील माने, आमदार डॉ. राजेंद्र पाटील-यड्रावकर आणि डॉ. संजय पाटील यांनी उपस्थिती लावली. विजेत्या संघांना उद्यानपंडित गणपतराव पाटील, राष्ट्रसेवा मंडळाचे अध्यक्ष गणपतराव सावगावे, माजी नगराध्यक्ष रावसाहेब पाटील व त्रिशला पाटील यांच्या हस्ते सन्मानित करण्यात आले.
स्पर्धेतील उत्कृष्ट खेळाडूंचाही विशेष गौरव करण्यात आला. पुरुष गटात जे.डी. स्पोर्ट्स-नोएडाचे गौरव कुमार (उत्कृष्ट खेळाडू), मलथलाई-बेंगळुरूचा हरिप्रसाद (उत्कृष्ट पकड), शिवमुद्रा-कौलवचा साहिल पाटील (उत्तम चढाई) यांनी चमकदार कामगिरी केली.
महिला गटात एम.डी. स्पोर्ट्स-पुणेच्या आर्या पाटील (उत्कृष्ट खेळाडू), शिवशक्ती स्पोर्ट्स-मुंबईच्या रुपाली बगड (उत्कृष्ट पकड) आणि शिरोडकर स्पोर्ट्स-मुंबईच्या साक्षी सावंत (उत्तम चढाई) यांनी उत्कृष्ट प्रदर्शन केले.
प्रा.आण्णासाहेब माने-गावडे यांनी स्पर्धेचे निरीक्षण केले. कार्यक्रमास डॉ. संजय पाटील, अॅड. सुशांत पाटील, माजी नगराध्यक्ष रावसाहेब पाटील, जवाहर पाटील, अभिजीत पाटील, महेश माळी, मोहन मोहिते, शरद आलासे, प्रकाश मोहिते, शरद तावदारे, त्रिशला पाटील, अक्षय आलासे यांच्यासह अनेक मान्यवर उपस्थित होते.