शिरोळ / प्रतिनिधी
कृषी दिनानिमित्त शिरोळ पंचायत समिती परिसरात वृक्षारोपण करून पर्यावरण संवर्धनाचा संकल्प करण्यात आला.यानिमित्त आयोजित कार्यक्रमात तालुका,जिल्हा व राज्य पातळीवर कृषी उत्पादनामध्ये उल्लेखनीय कामगिरी करणाऱ्या प्रगतिशील शेतकरी बांधवांचा सत्कार हातकणंगले लोकसभा मतदारसंघाचे खासदार धैर्यशील माने यांच्या हस्ते करण्यात आला.
यावेळी बोलताना मान्यवरांनी कृषी क्षेत्रातील शेतकऱ्यांचे योगदान अधोरेखित केले. शेतकऱ्यांच्या अथक परिश्रम, जिद्द आणि आधुनिक शेती तंत्रज्ञानाचा स्वीकार यामुळे देशाची अन्नसुरक्षा अधिक सक्षम होत असून कृषी क्षेत्राच्या विकासात त्यांचे मोलाचे योगदान असल्याचे सांगण्यात आले. शेतीमध्ये नवनवीन तंत्रज्ञानाचा अवलंब करून उत्पादनवाढ साधणाऱ्या शेतकऱ्यांचा गौरव करणे ही समाजाची सामूहिक जबाबदारी असल्याचेही यावेळी नमूद करण्यात आले.
कार्यक्रमाच्या प्रारंभी पंचायत समिती परिसरात वृक्षारोपण करण्यात आले. पर्यावरणाचा समतोल राखण्यासाठी अधिकाधिक वृक्ष लागवड व संवर्धन करण्याचा संकल्प उपस्थितांनी केला. पर्यावरण संरक्षण आणि शाश्वत शेती यांचा परस्परांशी असलेला निकटचा संबंध अधोरेखित करत वृक्षसंवर्धनाचे महत्त्वही यावेळी स्पष्ट करण्यात आले.
या कार्यक्रमास शिरोळ तालुका पंचायत समितीचे सभापती मिलिंद कुरणे, उपसभापती सौ. मनीषा कदम, सदस्य बाबासाहेब वनकोरे, प्रतीक पाटील, प्रवीण देसाई, फजलेअली पाटील, अविनाश पाटील, नाना उपाध्ये, सौ. सीमा म्हैशाळे, सौ. दीप्ती जाधव, जिल्हा परिषद सदस्या सौ. उत्तरा विजीत शिंदे, श्रीमंत विजीतसिंह शिंदे सरकार, रणजीतदादा कदम, मिथुल जाधव, गटविकास अधिकारी विजयकुमार परीट यांच्यासह विविध विभागांचे अधिकारी, पंचायत समिती सदस्य, प्रगतिशील शेतकरी आणि पत्रकार बांधव मोठ्या संख्येने उपस्थित होते.
कृषी दिनानिमित्त आयोजित या कार्यक्रमातून पर्यावरण संवर्धनाचा संदेश देतानाच कृषी क्षेत्रात उल्लेखनीय कार्य करणाऱ्या शेतकऱ्यांचा सन्मान करून त्यांच्या कार्याचा गौरव करण्यात आला. त्यामुळे उपस्थित शेतकरी बांधवांना नव्या जोमाने आणि आधुनिक तंत्रज्ञानाच्या साहाय्याने शेती करण्याची प्रेरणा मिळाली.