रस्ते मजबुतीकरणासाठी २२ कोटी, पुलांसाठी ३ कोटींचा निधी
शेतकरी, महिला, युवक व ग्रामीण विकासावर भर असलेला प्रगतीशील अर्थसंकल्प
पेठवडगाव / प्रतिनिधी
राज्य सरकारने सादर केलेल्या २०२६–२७ या आर्थिक वर्षाच्या अर्थसंकल्पात हातकणंगले विधानसभा मतदारसंघातील विविध विकासकामांसाठी सुमारे २५ कोटी रुपयांच्या निधीची तरतूद करण्यात आली असून या निधीमुळे तालुक्यातील रस्ते व पुलांच्या विकासाला मोठी चालना मिळणार असल्याची माहिती आमदार डॉ.अशोकराव माने यांनी दिली.मुख्यमंत्री देवेंद्र फडणवीस यांनी सादर केलेला हा अर्थसंकल्प प्रगतीशील, शाश्वत व सर्वसमावेशक विकासाला प्राधान्य देणारा असून राज्यातील सर्व घटकांच्या अपेक्षा पूर्ण करणारा असल्याचेही त्यांनी सांगितले.राज्याच्या आर्थिक प्रगतीला गती देतानाच ग्रामीण भागातील मूलभूत सुविधांचा विकास करण्यावर सरकारने विशेष भर दिला आहे.त्याच अनुषंगाने हातकणंगले विधानसभा मतदारसंघातील रस्ते व पुलांच्या विकासासाठी मोठ्या प्रमाणात निधी मंजूर करण्यात आल्याचे आमदार माने यांनी सांगितले. या निधीतून तालुक्यातील अनेक महत्त्वाचे रस्ते सुधारले जाणार असून वाहतुकीची सोय अधिक सुलभ होणार आहे.
मतदारसंघाच्या विकासासाठी सातत्यपूर्ण पाठपुरावा
हातकणंगले विधानसभा मतदारसंघातील विविध विकासकामांसाठी निधी उपलब्ध व्हावा यासाठी आपण सातत्याने शासनाकडे पाठपुरावा केला होता. मतदारसंघातील नागरिकांच्या गरजा लक्षात घेऊन रस्ते, पूल, पाणीपुरवठा, शेतीसंबंधित सुविधा आणि इतर मूलभूत विकासकामांसाठी मागणी करण्यात आली होती. या मागणीची दखल घेत राज्य सरकारने अर्थसंकल्पात २५ कोटी रुपयांची तरतूद केली असल्याचे आमदार माने यांनी सांगितले.या निधीपैकी २२ कोटी रुपये रस्त्यांच्या सुधारणा व मजबुतीकरणासाठी तर ३ कोटी रुपये पुलांच्या बांधकामासाठी मंजूर करण्यात आले आहेत. या कामांमुळे ग्रामीण भागातील संपर्क रस्ते अधिक मजबूत होणार असून नागरिकांच्या दैनंदिन प्रवासात मोठी सोय होणार आहे.
महत्त्वाच्या रस्त्यांच्या सुधारणा कामांना मंजुरी
या निधीतून तालुक्यातील अनेक प्रमुख रस्त्यांच्या सुधारणा व मजबुतीकरणाची कामे हाती घेण्यात येणार आहेत. यात मोजे तासगाव ते देलगाव हा महत्त्वाचा संपर्क रस्ता सुधारण्यात येणार आहे. तसेच इंगळी वसाहत ते तवडे मळा, इंगळी ते रुई, निलवडी ते परगाव, रुई ते जांभळीवाडी आणि दुधनी ते राजापूर या प्रमुख रस्त्यांच्या सुधारणा कामांना मंजुरी मिळाली आहे.या रस्त्यांवरून दररोज मोठ्या प्रमाणात नागरिकांची ये-जा होत असते. अनेक गावांना जोडणारे हे रस्ते शेतीमाल वाहतुकीसाठी तसेच विद्यार्थ्यांच्या प्रवासासाठी अत्यंत महत्त्वाचे आहेत. रस्त्यांची स्थिती सुधारल्यास ग्रामीण भागातील आर्थिक व्यवहारांना देखील चालना मिळणार आहे.
परगावजवळील पुलाच्या बांधकामाला मंजुरी
परगाव गावाजवळील पुलाच्या बांधकामालाही या अर्थसंकल्पातून मंजुरी देण्यात आली आहे. सुमारे ३५ मीटर लांबीचा हा पूल उभारण्यात येणार असून १६ व १७ साखळीपर्यंत रस्त्याचे सुधारकाम करण्यात येणार आहे. पावसाळ्यात या भागात वाहतूक विस्कळीत होण्याची समस्या निर्माण होत असल्यामुळे हा पूल अत्यंत आवश्यक होता. पुलाच्या बांधकामामुळे स्थानिक नागरिकांना वर्षभर सुरक्षित आणि सुलभ वाहतूक सुविधा उपलब्ध होणार आहेत.
शेतकऱ्यांसाठी दिलासा देणारे निर्णय
राज्य सरकारने सादर केलेल्या या अर्थसंकल्पात शेतकरी वर्गाला दिलासा देणारे अनेक निर्णय घेण्यात आले आहेत. वाढत्या कर्जाच्या ओझ्यामुळे अडचणीत सापडलेल्या शेतकऱ्यांना दिलासा देण्यासाठी कर्जमाफीसारखे महत्त्वाचे निर्णय घेण्यात आले आहेत. तसेच नियमित कर्जफेड करणाऱ्या शेतकऱ्यांना प्रोत्साहनपर लाभ देण्याचा निर्णय घेण्यात आला आहे.नियमित कर्जफेड करणाऱ्या शेतकऱ्यांना ५० हजार रुपयांपर्यंत प्रोत्साहनपर लाभ देण्याचा निर्णय हा ऐतिहासिक असून यामुळे प्रामाणिकपणे कर्जफेड करणाऱ्या शेतकऱ्यांचा सन्मान होणार आहे. या निर्णयामुळे राज्यातील लाखो शेतकऱ्यांना आर्थिक दिलासा मिळणार असल्याचे आमदार माने यांनी सांगितले.
शेतीमालाला जागतिक बाजारपेठ
या अर्थसंकल्पात शेती क्षेत्राला अधिक सक्षम करण्यासाठी विविध उपाययोजना करण्यात आल्या आहेत. शेतीमालाला जागतिक बाजारपेठ उपलब्ध करून देण्यासाठी मूल्यसाखळी निर्माण करण्यावर सरकारने भर दिला आहे. डिजिटल प्लॅटफॉर्मच्या माध्यमातून एकात्मिक कृषी इकोसिस्टीम उभारण्याची योजना आखण्यात आली आहे.यामुळे शेतकऱ्यांना आपल्या उत्पादनाला अधिक चांगला दर मिळण्यास मदत होणार आहे. तसेच शेतीमालाच्या प्रक्रिया उद्योगांना चालना मिळून ग्रामीण भागात रोजगाराच्या संधी निर्माण होण्याची अपेक्षा व्यक्त करण्यात येत आहे.
कृषी क्षेत्रासाठी नवीन योजना
राज्य सरकारने कृषी क्षेत्रासाठी अनेक महत्त्वाच्या योजनांची घोषणा केली आहे. यात चार नवीन कृषी विद्यापीठे स्थापन करण्याचा निर्णय घेण्यात आला आहे.यामुळे कृषी संशोधनाला चालना मिळणार असून शेतकऱ्यांना आधुनिक तंत्रज्ञानाचा लाभ मिळणार आहे.याशिवाय कृषी समृद्धी योजना आणि मुख्यमंत्री ग्रामीण पशुधन योजना यांसारख्या योजनाही जाहीर करण्यात आल्या आहेत. या योजनांमुळे शेती आणि पशुपालन या क्षेत्रांना बळकटी मिळणार असून ग्रामीण अर्थव्यवस्था अधिक सक्षम होणार आहे.
पूर नियंत्रणासाठी नवतंत्रज्ञानाचा वापर
राज्यातील वाढती लोकसंख्या आणि बदलते हवामान लक्षात घेता पूर नियंत्रणासाठी नवतंत्रज्ञानाचा वापर करण्याचा निर्णय सरकारने घेतला आहे. जागतिक बँकेच्या सहकार्याने महत्त्वपूर्ण प्रकल्प राबविण्याचेही नियोजन करण्यात आले आहे.पूरप्रवण भागांमध्ये आधुनिक तंत्रज्ञानाचा वापर करून पूर व्यवस्थापन अधिक प्रभावी करण्याचा सरकारचा प्रयत्न आहे. यामुळे नैसर्गिक आपत्तीमुळे होणारे नुकसान कमी करण्यास मदत होणार आहे.
महिला, युवक व उद्योग क्षेत्रासाठी संधी
या अर्थसंकल्पात महिला, युवक, उद्योग क्षेत्र आणि मजूर वर्गासाठीही अनेक सकारात्मक घोषणा करण्यात आल्या आहेत. महिलांच्या स्वावलंबनासाठी विविध योजना राबविण्याचा निर्णय घेण्यात आला आहे. युवकांसाठी रोजगारनिर्मितीवर विशेष भर देण्यात आला आहे.उद्योग क्षेत्राला चालना देण्यासाठी पायाभूत सुविधा मजबूत करण्याचेही सरकारचे धोरण आहे. ग्रामीण भागात लघुउद्योग आणि सूक्ष्म उद्योगांना प्रोत्साहन देण्यात येणार आहे. यामुळे स्थानिक पातळीवर रोजगाराच्या संधी वाढण्याची अपेक्षा आहे.
मतदारसंघाच्या सर्वांगीण विकासासाठी कटिबद्ध
हातकणंगले विधानसभा मतदारसंघाचा सर्वांगीण विकास करण्यासाठी आपण सातत्याने प्रयत्नशील असल्याचे आमदार माने यांनी स्पष्ट केले.मतदारसंघातील नागरिकांच्या समस्या सोडविणे आणि विकासकामांना गती देणे हे आपले प्रमुख उद्दिष्ट असल्याचे त्यांनी सांगितले.या निधीमुळे मतदारसंघातील अनेक प्रलंबित विकासकामांना गती मिळणार आहे. भविष्यातही विविध योजनांच्या माध्यमातून अधिकाधिक निधी मिळवून मतदारसंघाचा सर्वांगीण विकास करण्यासाठी प्रयत्न सुरू ठेवणार असल्याचे त्यांनी सांगितले.
मुख्यमंत्री व मंत्र्यांचे मानले आभार
हातकणंगले विधानसभा मतदारसंघासाठी अर्थसंकल्पात निधी मंजूर केल्याबद्दल मुख्यमंत्री देवेंद्र फडणवीस,उपमुख्यमंत्री एकनाथ शिंदे आणि अजित पवार,सार्वजनिक बांधकाम मंत्री शिवेंद्रराजे भोसले,आमदार डॉ.विनय कोरे तसेच संबंधित सर्व मंत्र्यांचे आमदार डॉ.अशोकराव माने यांनी आभार मानले आहेत.राज्य सरकारने ग्रामीण विकासाला प्राधान्य देत घेतलेल्या निर्णयांमुळे राज्याच्या प्रगतीला नवी दिशा मिळेल, असा विश्वासही त्यांनी व्यक्त केला. तसेच विकासकामांच्या माध्यमातून हातकणंगले मतदारसंघ अधिक सक्षम आणि प्रगत करण्यासाठी पुढील काळातही प्रयत्न सुरू राहतील, असे त्यांनी स्पष्ट केले.