मिरज / प्रतिनिधी
मिरज शहरातील ईदगाह माळ परिसरात मुसळधार पावसामुळे झाड कोसळून अनेक घरांचे मोठ्या प्रमाणावर नुकसान झाले. या घटनेनंतर महापौर धीरज सूर्यवंशी यांनी तात्काळ घटनास्थळी भेट देत बाधित कुटुंबांना दिलासा दिला आणि परिस्थितीचा आढावा घेतला.या नैसर्गिक आपत्तीमुळे काही कुटुंबांचे मोठे नुकसान झाले असून नागरिकांमध्ये भीतीचे वातावरण निर्माण झाले होते.अशा परिस्थितीत महापौर सूर्यवंशी यांनी प्रत्यक्ष भेट देऊन नागरिकांशी संवाद साधला, त्यांच्या अडचणी जाणून घेतल्या आणि त्यांना धीर दिला.या कठीण काळात प्रशासन आणि0महानगरपालिका तुमच्या पाठीशी खंबीरपणे उभी आहे, असे आश्वासन त्यांनी दिले.घटनास्थळी पाहणी करताना त्यांनी संबंधित अधिकाऱ्यांना तातडीने नुकसानग्रस्त भागाचा पंचनामा पूर्ण करण्याच्या सूचना दिल्या. तसेच बाधितांना शासकीय मदत जलद गतीने मिळावी यासाठी प्रशासनाशी सातत्याने पाठपुरावा सुरू असल्याचे त्यांनी सांगितले. आपत्तीग्रस्तांना त्वरित मदत मिळावी यासाठी सर्व यंत्रणा सज्ज असल्याचेही त्यांनी स्पष्ट केले.महापौरांच्या या तत्परतेमुळे स्थानिक नागरिकांनी समाधान व्यक्त केले. संकटाच्या काळात लोकप्रतिनिधी स्वतः उपस्थित राहून आधार देत असल्याने नागरिकांमध्ये विश्वास निर्माण झाला आहे. अनेकांनी प्रशासनाच्या कार्यपद्धतीचे कौतुक करत,लवकरात लवकर मदत मिळेल अशी अपेक्षा व्यक्त केली.दरम्यान, महानगरपालिका प्रशासनानेही नागरिकांना सतर्क राहण्याचे आवाहन केले आहे.मुसळधार पावसाच्या पार्श्वभूमीवर झाडांच्या फांद्या किंवा इतर धोकादायक वस्तूंपासून दूर राहण्याचा सल्ला देण्यात आला आहे.एकूणच, या घटनेनंतर महापौर धीरज सूर्यवंशी यांच्या नेतृत्वाखाली प्रशासनाने तातडीने हालचाली करत नागरिकांना दिलासा देण्याचा प्रयत्न केला असून, संकटग्रस्त कुटुंबांना लवकरच आवश्यक ती मदत मिळेल,असा विश्वास व्यक्त केला जात आहे.