शिरोळ / प्रतिनिधी
चैत्र वारीच्या पवित्र निमित्ताने पंढरपूरकडे निघालेल्या वारकऱ्यांच्या पायी दिंडीचे शिरोळ येथे उत्साहपूर्ण स्वागत करण्यात आले.येथील सामाजिक कार्यकर्ते मोहन यादव व त्यांच्या परिवाराने वारकऱ्यांच्या सेवेसाठी पुढाकार घेत भक्तीभावाचे दर्शन घडविले.कर्नाटक राज्यातील ममदापूर येथून दरवर्षीप्रमाणे यंदाही वारकऱ्यांची दिंडी पंढरपूरकडे मार्गस्थ झाली असून शिरोळ येथे त्यांचा मुक्काम करण्यात आला.गेल्या वीस वर्षांपासून मोहन यादव हे आपल्या परिवारासह दिंडीच्या मुक्कामाची,निवासाची तसेच भोजनाची उत्तम व्यवस्था करत आहेत. या परंपरेत सातत्य राखत यंदाही गुरुवारी दिंडीचे शिरोळ येथे आगमन झाले.आगमनावेळी वारकऱ्यांचे मोठ्या उत्साहात स्वागत करण्यात आले.मोहन यादव,सौ.सुवर्णा यादव,संग्राम माने व सौ.मनीषा माने यांनी पालखी व वीणेचे पूजन करून वारकऱ्यांप्रती आदर व्यक्त केला.या प्रसंगी धार्मिक वातावरणात विविध कार्यक्रमांचे आयोजन करण्यात आले. हरिनामाचा गजर, अभंग गायन व कीर्तनाने परिसर भक्तीमय झाला होता. वारकऱ्यांनी भक्तीभावाने सहभाग नोंदवून अध्यात्मिक समाधानाचा अनुभव घेतला.मुक्कामादरम्यान सर्व वारकऱ्यांसाठी स्वच्छ व सुसज्ज निवासाची व्यवस्था करण्यात आली होती.त्याचबरोबर स्वादिष्ट व पौष्टिक भोजनाचीही सोय करण्यात आली, ज्याचा सर्वांनी आनंद घेतला.यादव परिवाराच्या या सेवाभावी उपक्रमामुळे वारकऱ्यांना प्रवासात मोठा दिलासा मिळतो.त्यांच्या सातत्यपूर्ण कार्याचे सर्वत्र कौतुक होत असून समाजासाठी हे एक प्रेरणादायी उदाहरण ठरत आहे.दिंडी संयोजकांनी यादव परिवाराचे मनःपूर्वक आभार मानत त्यांच्या कार्याला शुभेच्छा दिल्या.वारकरी परंपरेतील ‘सेवा हीच ईश्वरभक्ती’ या भावनेचा प्रत्यय या उपक्रमातून पुन्हा एकदा आला असून शिरोळमध्ये भक्ती, सेवा आणि एकतेचा सुंदर संगम पाहायला मिळाला.